Spunagreind gegn hlutdrægni í prófayfirferð
Á ráðstefnu Kennsluakademíunnar í nóvember kynnti Guðrún Rútsdóttir rannsókn þar sem borin voru saman prófayfirferð spunagreindarlíkana, reyndra kennara og óreyndra kennara. Niðurstöðurnar benda til þess að spunagreind geti bæði flýtt fyrir yfirferð og hjálpað kennurum að draga úr hlutdrægni, meðal annars gagnvart nemendum með veikari enskukunnáttu.
Guðrún Rútsdóttir kynnti niðurstöður sínar og samstarfsfélaga um notkun spunagreindar til að minnka hlutdrægni í prófayfirferð á ráðstefnu kennsluakademíunnar þann 21. nóvember síðastliðinn.
Þar lýsti hún áskorunum sem fylgja kennslumats fjölbreytts hóps nemenda sem koma úr ýmsum áttum, bæði landfræðilega séð og eins akademískt séð.
Áður hefur verið sýnt fram á kynjahalla í prófayfirferð hjá óreyndum kennurum (Hofer, 2015) og lýsti hún áhyggjum sínum af hlutdrægni í prófayfirferð byggða á tungumálafærni nemenda og vildi því bera saman yfirferð spunagreindar og kennara með mismikla kennslureynslu.
Notuð voru þrjú mismunandi spunagreindarlíkön við prófayfirferðina og var fylgni milli líkananna mjög góð. Fylgnin milli líkana og reyndra kennara var af svipuðum toga en fylgni óreyndra kennara var ögn lægri. Við nánari skoðun kom í ljós að óreyndir kennarar gáfu nemum með lélega enskukunnáttu hlutfallslega lægri einkunn en reyndir kennarar og líkönin.
Ef litið er til meðaleinkunnar hvers einkunnagjafa sést að spunagreindarlíkönin gefa mun lægri meðaleinkunnir en bæði reyndir og óreyndir kennarar en sökum hárrar fylgni líkana og reyndra kennara er hægt að skala upp einkunnir spunagreindarinnar.
Niðurstöðurnar sýna því að spunagreind getur komið að góðu gagni við prófayfirferð, bæði til að flýta fyrir og eins til að aðstoða kennara við að meta hlutdrægni sína.
